பெண்களுக்கு ஏற்படும் எடை இழப்பு!
டாக்டர் கற்பகாம்பாள் சாய்ராம்
மகப்பேறியல் மற்றும் மகளிர் மருத்துவ நிபுணர் & கருவுறுதல் நிபுணர், ஸ்ரீ சாய் சிறப்பு சிகிச்சை மையம், சென்னை–600 004
ஆரோக்கியத்துடன் இருக்கும் ஒருவருக்கு வயது அதிகரிக்கும்போது எடை சற்று குறைவது இயல்புதான். ஆனால், ஒருவருக்கு ஒரு மாதத்தில் இரண்டரை கிலோவுக்கு (உடல் எடையில் 5%) மேலே எடை குறைந்தால் அல்லது ஆறு மாதத்தில் நான்கரை கிலோவுக்கு (உடல் எடையில் 10%) மிகுதியாக எடை குறைந்தால் அதைப்பற்றி சற்று சிந்திப்பது அவசியம். இது முதுமையின் விளைவு என்று உதாசீனப்படுத்தக் கூடாது.
பெண்களுக்கு ஏற்படும் எடை இழப்புக்கான காரணங்கள்
முதுமையில் எடை இழப்புக்கு புற்று நோய் ஒரு முக்கிய காரணமாகும். புற்று நோயால் பசியின்மை ஏற்படும், இதனால் எடை இழப்புக்கு வழிவகுக்கும். உடலில் உள்ள ஊட்டச்சத்து இருப்புகளை விரைவாக உண்ணும் புற்று நோய்களினால் விரைவாக எடையை இழக்கச் செய்யும். வயதான பெண்களிடம் பொதுவாக காணப்படும் புற்றுநோய்கள் மார்பகப் புற்று நோய், கருப்பைப் புற்று நோய், கர்ப்பப்பை வாய்ப் புற்று நோய்களாகும். கருப்பைப் புற்று நோயை ஆரம்பத்திலேயே கண்டறிந்து உரிய நேரத்தில் தக்க சிகிச்சையளித்தால், குணப்படுத்தி விடலாம். எனவே கர்ப்பப்பைவாய்ப் புற்று நோய்க்கான பாப்ஸ்மையர் பரிசோதனை மற்றும் மார்பகப் புற்றுநோய்கான மேமோகிராம் பரிசோதனையை 40 வயதிற்கு மேல் உள்ள பெண்கள் ஆண்டுதோறும் செய்யவேண்டும் மற்றும் கருப்பையில் ஏற்படும் பிரச்னைகளை கண்டறிய ஆண்டுதோறும் அடிவயிற்றுப் பகுதியை ஸ்கேன் செய்துகொள்ள வேண்டும்.
நோய்த் தொற்று
எந்த ஒரு நீண்டகால தொற்று நோயும் எடை இழப்புக்கு வழிவகுக்கும். வயதான பெண்களுக்கு அடிக்கடி ஏற்படுவது சிறுநீர்த் தொற்றாகும். அவை சிறுநீரகங்களுக்குப் பரவி, சிறுநீரகத் தொற்றுக்கு வழிவகுக்கும். பிற பொதுவான நோய் தொற்றுகளில் காச நோய் நம் நாட்டில் அதிகம் காணப்படுகிறது. இது எல்லா வயதினரையும் தாக்கும். ஏழ்மை நிலையில் உள்ள பெண்களுக்கு காச நோய் வர வாய்ப்பு அதிகம்.
குறைந்த ஊட்டச் சத்து
நம் நாட்டில் பெண்கள் எப்போதும் தங்கள் குடும்ப உறுப்பினர்கள் சாப்பிட்ட பின் மீதம் உள்ள உணவைத்தான் உண்ணுவார்கள். அவர்கள் எப்போதும் அவர்களின் உடல்நலம் மற்றும் ஊட்டச் சத்து குறித்து கவலைப்பட மாட்டார்கள். வயதான பெண்களின் எடை இழப்புக்கு இதுவும் ஒரு காரணம். அதனால் பெண்கள் தங்கள் உடல் நலத்தை கவனித்துக் கொண்டால்தான் தங்களின் குடும்பத்தைக் கவனித்துக் கொள்ள முடியும். சுவர் இருந்தால் தான் சித்திரம் வரைய முடியும்?
தைராய்டு தொல்லை
தைராய்டு சுரப்பி தைராக்சின் நீரை மிகுதியாகச் சுரந்தால் ‘தைரோடாக்சிகோஸிஸ்’ எனும் தொல்லை ஏற்படும். இது பெண்களை அதிகம் தாக்கும் முக்கியமான பிரச்னை. இந்நோயினால் பாதிக்கப்பட்டவர்களுக்கு உடல் மிகவும் மெலிந்து இருக்கும். பசி அதிகமாக இருக்கும். ஆனால் உடல் மட்டும் இளைத்துக் கொண்டே போகும். அடிக்கடி வயிற்றுப் போக்கும் ஏற்படும். எப்போதும் ஒருவித பதற்றத்துடனே இருப்பார்கள். அதிகமாகப் பேசுவார்கள். கண்கள் இரண்டும் வெளியே தள்ளியது போல பெரிதாகக் காணப்படும். ஒரு சிலருக்கு தைராய்டு சுரப்பி வீங்கி இருக்கும். கைகளில் நடுக்கம் அதிகம் இருக்கும். இந்நோயை ரத்தப் பரிசோதனை மூலமும், தைராய்டு ஸ்கேன் பரிசோதனை மூலமும் எளிதில் கண்டறிந்து தக்க சிகிச்சை அளிக்கலாம்.
கட்டுப்பாடற்ற நீரிழிவு
நீரிழிவு குறைபாடு காரணமாகவும் எடை இழப்பு ஏற்படலாம். நீரிழிவு நோயாளிகளின் சர்க்கரையின் அளவு கட்டுப்பாடு அற்று நீண்ட நாட்கள் இருந்தால் அது எடை இழப்புக்கு வழிவகுக்கும். இந்த நீரிழிவு நோய் இரைப்பை நோய்க்கும் வழிவகுக்கும். அதனால் அங்கு குடல் இயக்கம் குறைய, பசியும் குறையும். இதுவே கட்டுப்பாடற்ற நீரிழிவு நோய் உள்ளவர்கள் எடை இழப்புக்கு முக்கிய காரணம்.
மன அழுத்தம், மனச்சோர்வு மற்றும் தூக்கமின்மை
வயதான பெண்களுக்கு குடும்பப் பிரச்னைகளாலும், நிதி பிரச்சனைகளாலும் மனச்சோர்வு ஏற்பட வாய்ப்பு அதிகம். கூட்டுக் குடும்பத்தில் இல்லாமல் தனித்து வாழும் பெண்களுக்கு, மனச்சோர்வு வர வாய்ப்பு இன்னமும் அதிகமாக இருக்கிறது. முதுமையில் தங்களால் அடிப்படை தேவைகளுக்கு கூட மற்றவர்களை சார்ந்திருக்கும் போது மனச்சோர்வு ஏற்படுகிறது. முதுமையின் காரணமாக பெண்களுக்கு ஒரு பாதுகாப்பின்மை ஏற்பட, அதனாலும் மன அழுத்தம் அதிகமாகிறது. இதனால் பசி குறைய, உணவு குறைய, எடை குறைய வாய்ப்பு மிகுதியாகிறது. இது முதுமையின் விளைவு என்று எண்ணி பல பெண்கள் மருத்துவரின் உதவியை நாடுவது இல்லை.
கொரோனா காலத்தில் வீட்டிலேயே தனிமைப்படுத்திக் கொண்ட பெண்களுக்கும், வார்டுகளில் இருக்கும் பெண்களுக்கும் உளவியல் பாதிப்பு ஏற்பட்டு பசியின்மை மற்றும் எடை இழப்பு ஏற்படுவதை பார்க்க முடிகிறது.
எடை இழப்புக்கு நோய்க் காரணம் இல்லையெனில் பின்பற்றத்தக்க வழிமுறைகள்
- புரதச்சத்து அதிகம் உள்ள உணவினை சேர்த்துக்கொள்ளலாம். உதாரணம்: பால், முட்டையின் வெள்ளைக்கரு, மீன், கோழி, சோயா, காளான், ஓட்ஸ், பருப்பு வகைகள்.
- மாவுச்சத்தும் கொழுப்புச்சத்தும் நிறைந்துள்ள உணவுகள் எடையை அதிகரிக்க உதவும். உதாரணம்: அரிசி, கிழங்கு வகைகள், நெய், வெண்ணெய், இனிப்புகள்.
- ‘கொழுத்தவனுக்கு கொள்ளு இளைத்தவனுக்கு எள்ளு’… ஆகையால் இனிப்பு கலந்த எள் உருண்டைகளை தினமும் உண்ணலாம்.
- தண்ணீர் அதிகம் குடிக்க வேண்டும்.
- தினமும் 600 – 800 மிகி வைட்டமின் டி எடுத்துக் கொள்ளலாம்.
எடை இழப்பு என்பது ஒரு முக்கிய மருத்துவ பிரச்சனை. அடிப்படையாக உடல் அல்லது மன நோயைச் சார்ந்திருக்கக்கூடும். ஆரம்பத்திலேயே கண்டறிந்து தக்க சிகிச்சையளித்தால் எடை இழப்பை சீர் செய்து நலமாக வாழ முடியும்.
